မင်းလက်ပံရွာ (ကျားဖြန့်ရုံ )ငွေလိမ်လုပ်ငန်းက နိုင်ငံခြားသားတွေ သောင်ရင်းမြစ်ဘေးမှာ ထိုင်းနိုင်ငံဘက်က လက်မခံလို့ ကမ်းကူးမရဖြစ်နေ

 မင်းလက်ပံရွာ (ကျားဖြန့်ရုံ )ငွေလိမ်လုပ်ငန်းက နိုင်ငံခြားသားတွေ သောင်ရင်းမြစ်ဘေးမှာ ထိုင်းနိုင်ငံဘက်က လက်မခံလို့ ကမ်းကူးမရဖြစ်နေ

_
By - People's Radio Myanmar
Date - November 27, 2025

ထိုင်း-မြန်မာနယ်စပ် မြဝတီမြို့ မင်းလက်ပံရွာနေရာက DKBA ကျားဖြန့် ငွေလိမ်လုပ်ငန်းခြံဝင်းကို KNLA မဟာမိတ်တပ်တွေ ဝင်းရောက်ဖမ်းဆီးစစ်ဆေးမေးမြန်းပြီး ပြန်လွှတ်ပေးထားတဲ့ နိုင်ငံခြားသားတွေ ထိုင်းနိုင်ငံဘက်ကူးဝင်ဖို့ သောင်ရင်းမြစ်ဘေးနေရာမှာ နိုဝင်ဘာလ ၂၅ရက်ကနေ အခု၂၇ ရက်အထိ လူထောင်ချီသောင်တင်နေတယ်လို့ သိရပါတယ်။

ပြီးခဲ့တဲ့ နိုဝင်ဘာ ၂၁ရက်က DKBA ဗိုလ်သခွားသီးရဲ့ ကျားဖြန့်ခြံဝင်းကို KNLA တပ်ဖွဲ့က စီးနှင်းခဲ့ရာက ငွေလိမ်လုပ်ငန်းနေရာများကို ဆက်စပ်ပြီး ငွေလိမ်အလုပ်သမား လူထောင်ချီရှိနေတဲ့ ကိစ္စအပေါ် နိုင်ငံခြားသားအလုပ်သမားတွေကို စစ်ဆေးမေးမြန်းမှုတွေ အထောက်အထားသိမ်းဆည်းမှုတွေ ဆက်လုပ်နေတာပါ။

လက်ရှိ KNPF ကရင်ရဲတပ်ဖွဲ့က စစ်ဆေး‌‌မှတ်တမ်းယူပြီးတဲ့ နိုင်ငံခြားသား ‌‌‌‌‌၆၀၀ရာ‌ကျော်ကို ထိုင်းနိုင်ငံ ဘက် နိုဝင်ဘာ ၂၃ ရက် ညကလွှဲပြောင်းပေးခဲ့ပြီးနောက်ထပ် ထိုင်းဘက်လွှဲပြောင်းဖို့ ကျန်နေသူတွေကို ထိုင်းနိုင်ငံဘက်က ကမ်းကူးဝင်ခွင့်လက်မခံသေးတဲ့ အခြေအနေကြောင့် လူ ၁၀၀၀ကျော် သောင်ရင်းမြစ် ဘေးမှာစုဖွဲ့နေထိုင်နေရပါတယ်။

" ပထမ ရက်က ထိုင်းတွေ နဲ့ တရုတ်၊ ဗီယက်နမ်၊ လာအို လူ၆၀၀ကျော် လွှဲ လိုက်တယ် ညဘက် ၊‌ နောက်ရက်တွေမှာ ထိုင်းဘက်က လက်မခံသေးဘူး၊ စစ်တပ်က ကမ်းပေးမကူးဘူး၊ ညဘက်အေးတော့ မီးပုံဖိုပြီးနေနေကြတယ်၊ ထိုင်းဘက်ကမ်းကို ကမ်းကူးပေးဖို့ အော်ခေါ်နေကြတယ်၊ ထိုင်းဘက်က‌ တော့အခုချိန်ထိ လက်မခံသေးဘူး"

အဲ့ဒီအခြေအနေကို ဒီကနေ့မှာ KNU တာဝန်ရှိသူတွေက သောင်ရင်းမြစ်ဘေးနေနေရတဲ့ ကျားဖြန့်အလုပ်သမား နိုင်ငံခြားသားတွေကို စားသာက်စရာတွေဖြန့်ဝေကျွေးမွေး နေတယ်လို့သိရပါတယ်။

အခု မနက်ပိုင်းကနေ နေ့လည်ပိုင်းအထိ မင်းလက်ပံကျေးရွာ အရှေ့ပိုင်းမှာ အကြမ်းဖက်စစ်တပ်နဲ့ KNLA မဟာမိတ်တပ်တွေ တိုက်ပွဲအပြင်းအထန်ဖြစ်နေလို့ ထိုင်းစစ်တပ် နဲ့ ထိုင်းအာဏာပိုင်တွေစောင့်ကြည့် နေသလို သောင်ရင်းမြစ်ဘေးက ကျားဖြန့် နိုင်ငံခြားသားတွေလည်း နှစ်ဖက်တိုက်ပွဲသံတွေကြားမှာ ပိတ်မိသလို ဖြစ်ကြုံနေပါတယ် ။